Хөхний сүүний ач холбогдол

    Дөнгөж төрөөд энэ хорвоотой танилцаж буй энхрий үрсийн тань эрүүл мэндэд хөхний сүү олон талын ач холбогдолтой. Хөхний сүүгээр хооллож байгаа хүүхэд өвчлөх нь бага байдаг. Хүүхдийг 6 сар хүртэл нь зөвхөн хөхний сүүгээр хооллож, дараа нь нэмэгдэл хоолонд оруулснаар хүүхэд хэрэгцээт шимт бодисоо хангалттай авч, хэвийн өсөж бойжих нөхцөл бүрдэнэ.

Хөхний сүүний ач холбогдол:

•  Хөхний сүүгээр хооллодог хүүхэд тэжээвэр хүүхдийг бодвол суулгалт, хоол боловсруулах замын халдвар, амьсгалын замын халдварт өвчнөөр өвдөх нь бага байдаг.
• Бифидус хэмээх хүчин зүйл нь хүүхдийн гэдсэнд тусгай бичил биетэн өсөж үржихэд нөлөөлдөг бөгөөд энэ нь эмгэг үүсгэгч бусад нянгаас хамгаалдаг. 
• Үрэвслийн эсрэг олон хүчин зүйлс агуулах ба үрэвсэл явагдах шалтгааныг бууруулдаг.
• Хөхний сүүний амьд эсүүд болох лимфоцит, макрофаг нь аливаа өвчний үүсгэгчийг устган бие махбодийг халдвараас хамгаална.
• Хүүхдийг эхийн өвчнөөс хамгаалах эсрэг бие хөхний сүүнд агуулагддаг. 
• Өсөлтийн хүчин зүйлс нь хүүхдийн өсөлт, бойжилт, дархлалын ба төв мэдрэлийн тогтолцоо, арьс зэрэг эрхтний өсөлт хөгжлийг хангаж байдаг.
• Хөхний сүү вирус, шимэгч хорхойн эсрэг хүчин зүйлс агуулдаг.
• Хөхний сүүний уураг казеин багатай, тогтоц нь зөөлөн, хурдан шингэдэг учир харшил үүсгэдэггүй. 
• Хөхөөр хооллох үед хүүхдийн хоол боловсруулах тогтолцоо хурдан хөгжиж, харийн уураг нэвтрэн орж, харшил үүсгэхээс сэргийлдэг.
• Харийн уураг нэвтрэлт багассанаас харшлын хариу урвал үүсэхээс илүү дархлаа тэвчил үүсгэдэг.
• Цайр, ханаагүй өөхний хүчлүүд зэрэг шим бодисууд нь хүүхдийн дархлалын тогтолцоо гүйцэд хөгжихөд нөлөөтэй.
• Хүүхдийн тархи, мэдрэлийн хөгжилд онц чухал ач холбогдолтой цистейн, таурин амин хүчлүүд агуулдаг. 
• Төмөр цус багадалтаас зайлшгүй сэргийлдэг. Үхрийн сүүн дэх төмрийн зөвхөн 10% нь шимэгддэг бол хөхний сүүний нийт төмрийн 50% нь шимэгддэг.
• Хөхний сүүнд А, С амин дэм хангалттай хэмжээгээр агуулагддаг.
• Хэрэв эх А амин дэм ихтэй хоол хангалттай иддэг бол хөхний сүү А амин дэмээр баялаг байна. Иймд хөхний сүү хүүхдийг 2 нас хүртэл нь хэрэгцээт А амин дэмээр бүрэн хангаж чаддаг.

Энийг уншив: Хөхний сүүний ач холбогдолжиргэе!